ആര്‍ത്തവം അശുദ്ധിയോ? ആര്‍ത്തവത്തെ കുറിച്ച്

ആര്‍ത്തവത്തെ കുറിച്ച്
.......................................
(ഭഗിനി വിദ്യ എഴുതിയത്.)
വായിക്കുക മുഴുവന്‍

ആർത്തവം  അശുദ്ധിയോ ?

ഒരു ചാനൽ ചർച്ചയിൽ ഒരു പെണ്കുട്ടി പറയുന്നത് കണ്ടു ആർത്തവം ഉള്ള സമയം അശുദ്ധിയാണ് അതാണ് ഇതാണ് എന്നു വീട്ടിൽ പറയുന്നത് കൊണ്ട് വീട്ടിലേക്ക് പോകാറില്ല ഹോസ്റ്റലിൽ ആണ് കഴിയുന്നത് എന്നു.അങ്ങനെ അശുദ്ധി ഒന്നും ഇല്ല അതുകൊണ്ട് ആർത്തവം ഉള്ള സമയം ക്ഷേത്ര ദർശനം ചെയ്യണം എന്നാണ് തന്റെ അഭിപ്രായം എന്നും അവർ പറഞ്ഞു.

അപ്പോൾ ഈ പോസ്റ്റ് വീണ്ടും പോസ്റ്റ് ചെയ്യാൻ ഉള്ള കാരണം ഇത് തന്നെയാണ്.സ്ത്രീ ആയി ജനിച്ചിട്ടും ആർത്തവത്തെ കുറിച്ചോ ആർത്തവ സംസാകാരത്തെ കുറിച്ചോ അവർക്ക് കേവല ധാരണ പോലുമില്ല എന്നത് സുവ്യക്തം.
ഒന്നാമത് ഇന്നത്തെ ആളുകൾക്ക് വിദ്യാഭ്യാസം ഉണ്ടെങ്കിലും സാമാന്യ വിവരമോ ചിന്താശേഷിയോ ഇല്ല എന്നത് ഒരു വസ്തുതയാണ്. അങ്ങനെ ഉള്ളവർ സകലതിനെയും മുക്തകണ്ഠം എതിർക്കുക അല്ലാതെ എന്താണ് അതിന് പിന്നിലുള്ള വാസ്തവം എന്നതിനെ കുറിച്ചു ചിന്തിക്കാറില്ല.അത് കൊണ്ട് ഇത്തരക്കാർക്ക് സകലതും ഇന്നത്തെ കാലത്ത് ഒന്നുകിൽ പഴഞ്ചൻ രീതി,അതല്ലെങ്കിൽ അനാചാരം ദുരാചാരം അതും അല്ലെങ്കിൽ അന്ധവിശ്വാസം.
ചുരുക്കത്തിൽ ആർത്തവത്തെ കുറിച്ചുള്ള ഒരു സാമാന്യ വിവരണം നൽകുക എന്നത് മാത്രമാണ് എന്റെ ലക്ഷ്യം.

പൊതുവേ അന്നും ഇന്നും ആര്‍ത്തവത്തെ കുറിച്ച് ഒരുപാട് തെറ്റിധാരണകളും ഉണ്ട് എന്നതാണ് യാഥാര്‍ത്ഥ്യം.

ഇന്ന് പരസ്യമായ രഹസ്യമാണ് സ്ത്രീകളുടെ ആർത്തവം.പക്ഷേ നേരത്തെ ഇതല്ലായിരുന്നു സ്ഥിതി.പൊതുവേ ഉള്ള ഒരു സംസാരവിഷയം ആയിരുന്നില്ല ആര്‍ത്തവം.ആ ദിവസങ്ങളില്‍ സ്ത്രീകള്‍ സ്വയം പിന്‍വാങ്ങുക ആണ് ഉണ്ടായിരുന്നത്.പുരുഷന്മാര്‍ ഇതൊക്കെ അറിയാന്‍ തുടങ്ങിയിട്ട് തന്നെ അധികം ആയിട്ടില്ല.

ആര്‍ത്തവത്തെ കുറിച്ചുള്ള പുരുഷജനങ്ങളുടെ ധാരണകള്‍ അറിയാന്‍ ഞാന്‍ എന്റെ ചില പുരുഷ സുഹൃത്തുക്കളോട് കാര്യം തിരക്കി,വളരെ രസകരമായ ഉത്തരങ്ങള്‍ ആണ് എനിക്ക് കിട്ടിയത്.ചിലര്‍ക്ക് ഇന്നും അതിനെ കുറിച്ച് വ്യക്തമായ ധാരണ തന്നെ ഇല്ല.

ഇതൊന്നും ഞങ്ങളുടെ കാര്യമല്ല എന്ന് വിചാരിക്കുന്ന ആണുങ്ങളും ഇതൊന്നും നിങ്ങള്‍ അറിയേണ്ട കാര്യമല്ല എന്ന് പറഞ്ഞു പഠിക്കുന്ന സ്ത്രീകളും തന്നെ ആണ് ഇതിനു കാരണം.

ആര്‍ത്തവം ഒരു ശാരീരിക പ്രക്രിയ ആണ് .സ്ത്രീക്കു അമ്മയാകാന്‍ ഉള്ള യോഗ്യത കൈവന്നിരിക്കുന്നു എന്നതിന്റെ അടയാളം ആണ് ആര്‍ത്തവം.പിന്നെ കുറച്ചു രക്തവും വരും.ഇത്രയുമാണ് പൊതുവേ ഉള്ള അറിവുകള്‍.

നമുക്ക് നോക്കാം....

എന്താണ് ആര്‍ത്തവം....??
°°°°°°°°°°°°°°°°°°°°°°°°°°°°°°

ആര്‍ത്തവം...മെന്‍സസ്...പീരീഡ്‌സ്....ഒരു സ്ത്രീ ശരീരത്തിലെ മാസാമാസം ഉണ്ടാകുന്ന ഒരു ശാരീരിക പ്രക്രിയ ആണ് ആര്‍ത്തവം ഈ സമയം.ഓരോ മാസവും ഗര്‍ഭധാരണത്തിനായി ഗര്‍ഭപാത്രം തയ്യാറെടുക്കുന്നു.തലച്ചോറിലെ ചില ഗ്രന്ഥികളുടെയും ചില ഹോര്‍മോണുകളുടെയും പ്രവര്‍ത്തനങ്ങളുടെ ഫലമായി പുരുഷ ബീജവുമായി ചേരാന്‍ അണ്ഡം ഉത്പാദിക്കപ്പെടുന്നു അവ വളർച്ചയെത്തി പുറത്തുവരുന്നു ഇതാണു അണ്ഡവിസർജനം.ഇങ്ങനെ ഉള്ള അണ്ഡം അന്നേ മാസം പുരുഷ ബീജവും ആയി ചേരാത്ത പക്ഷം ഗര്‍ഭപാത്രത്തിലെ പ്രവര്‍ത്തനങ്ങള്‍ നിഷഫലമാവുകയും അവിടെ രൂപപ്പെട്ട എൻഡോമെട്രിയം (ഗര്‍ഭ പാത്രത്തിലെ ഉള്ളറയില്‍ ഉണ്ടാവുന്ന MUCOUS MEMBRANE,ഇവ കട്ടി ഉള്ളതും ധാരാളം രക്തകോശങ്ങള്‍ ചേര്‍ന്നതും ആണ്) നശിച്ചു രക്തതോടൊപ്പം പുറം തള്ളപ്പെടുകയും ചെയ്യുന്നു.ഇതാണ് സംഭവം.വളരെ സങ്കീര്‍ണ്ണമായ പ്രവര്‍ത്തനങ്ങള്‍ ഒത്തു ചേരുന്നതാണ് ആര്‍ത്തവം.

ആര്‍ത്തവരക്തം
°°°°°°°°°°°°°°°°°°°°

സാധാരണ നമ്മുടെ ദേഹത്തില്‍ എവിടെങ്കിലും മുറിവുണ്ടായാല്‍ പുറത്തു വരുന്ന രക്തമല്ല ആര്‍ത്തവരക്തം.ഗര്‍ഭാശയ അന്തര്‍ഭാഗത്തെ പ്രത്യേക സ്രവങ്ങളും നശിച്ച കോശങ്ങളും അടങ്ങിയിരിക്കുന്നതു കാരണം ആര്‍ത്തവരക്തം ഇരുണ്ട നിറത്തിലുള്ള രക്തവര്‍ണ്ണമായിരികും,കട്ട പിടിക്കാത്തതും കറ പിടിക്കാത്തതും ദുര്‍ഗന്ധമുള്ളതും സാധാരണ രക്തത്തെ അപേക്ഷിച്ച് ലേശം കട്ടി കൂടിയതും ആയിരിക്കും.ഓരോ സ്ത്രീയിലും രക്തത്തിന്റെ അളവും ആര്‍ത്തവം നീണ്ടു നില്‍ക്കുന ദിവസങ്ങളുടെ എണ്ണത്തിലും വ്യത്യാസം ഉണ്ട്.

ആര്‍ത്തവകാലത്തെ ശാരീരിക-മാനസിക
°°°°°°°°°°°°°°°°°°°°°°°°°°°°°°°°°°°°°°°°°°°°°°°° ബുദ്ധിമുട്ടുകള്‍
°°°°°°°°°°°°°°°°°

100 ഇല്‍ 85 ഇല്‍ അധികം സ്ത്രീകള്‍ ആര്‍ത്തവകാലത്ത് പല തരത്തില്‍ ഉള്ള ശാരീരിക ബുദ്ധിമുട്ടുകള്‍ അനുഭവിക്കുന്നുണ്ട്.അതില്‍ തന്നെ 5 മുതല്‍ 10 വരെ ശതമാനം സ്ത്രീകളും അധികഠിനമായ ശാരീരിക ക്ലേശങ്ങള്‍ അനിഭവിക്കുന്നവര്‍ ആണ്. PMS-Premenstrual Syndrome അതായത് ആര്‍ത്തവം തുടങ്ങുന്നതിനു 5 മുതല്‍ 11 ദിവസം വരെ സ്ത്രീകള്‍ക്ക് ഉണ്ടാകുന്ന ശാരീരിക മാറ്റങ്ങളും ബുദ്ധിമുട്ടുകളും ആണ് PMS.

ഇനി ഈ സമയയങ്ങളില്‍ ഉണ്ടാവുന്ന സ്ത്രീകളുടെ ശാരീരിക ബുദ്ധിമുട്ടുകള്‍ എന്തൊക്കെ ആണ് എന്ന് ചോദിച്ചാല്‍ ശരീരക്ഷീണം മുതല്‍ തലവേദന,തലകറക്കം,നടുവേദന,പുറംവേദന,കാലുകഴക്കലും വേദനയും,അടിവയര്‍ വേദന,ഛർദ്ദി,സ്തനങ്ങളില്‍ വേദന,വയര്‍ വീര്‍ക്കല്‍,ദഹനക്കുറവു,മലബന്ധം,ചിലര്‍ക്ക് ഗര്‍ഭകാലത്തെന്നപോലെ ഞരമ്പുകള്‍ തടിക്കുക കാലില്‍ നീര് വെക്കുക വരെ ഓരോ സ്ത്രീകളെയും അപേക്ഷിച്ച് ഉണ്ടാവുന്ന ശാരീരികക്ലേശങ്ങള്‍ ആണ്.മാത്രവുമല്ല ശരീര ഊഷ്മാവ് കൂടുകയും രക്തസമ്മര്‍ദ്ദം ഉയരുകയും ചെയ്യും.

ഇനി മാനസിക ബുദ്ധിമുട്ടുകള്‍ പറഞ്ഞാല്‍ ആര്‍ത്തവ കാലത്ത് . ദേഷ്യം,ശ്രദ്ധ ഇല്ലായ്മ,വിഷാദം,വിമ്മിഷ്ടം,ഉത്കണ്‍ഠ,ഗര്‍ഭകാലത്തെ പോലെ ചില ഭക്ഷണങ്ങളോടുള്ള CRAVINGS ഇനിയും ചിലരില്‍ ഭക്ഷണത്തോട് താല്പര്യമില്ലായ്മ തുടങ്ങിയവ ഉണ്ടാകും.

ആര്‍ത്തവം വിവിധ മതങ്ങളില്‍
°°°°°°°°°°°°°°°°°°°°°°°°°°°°°°°°°°°°

ഹിന്ദു മത വിശ്വാസപ്രകാരം ആര്‍ത്തവം തുടങ്ങി 7 ദിവസത്തേക്ക് എങ്കിലും ക്ഷേത്രപ്രവേശനം ചെയ്യാറില്ല.പണ്ടൊക്കെ കേരളത്തിലെ ചില ക്രൈസ്തവ കുടുംബങ്ങളിൽ സ്ത്രീകൾ ആര്‍ത്തവമായി ഇരിക്കുന്ന അവര്‍ പള്ളികളില്‍ പോയിരുന്നില്ല എന്ന് ഈ സമയം പള്ളിയിൽ നിന്നു അച്ഛൻ ആനാം വെള്ളം കൊടുത്തു വിടുന്ന പതിവ് ഉണ്ടായിരുന്നു എന്നും കേട്ടിരിക്കുന്നു.മുസ്ലിം സമുദായത്തിലും similar ആയ ആചാരങ്ങൾ ഉണ്ടെന്നാണ് അറിവ്.നിസ്കാരം ഒന്നും ഈ സമയങ്ങളില്‍ പാടില്ല എന്നും കേട്ടിരിക്കുന്നു.
ഇത്രയുമാണ് സ്ത്രീകളുടെ ആര്‍ത്തവത്തെ കുറിച്ചുള്ള പൊതുവായ വിവരങ്ങള്‍.....

ഇനി ഒരു പെണ്ണ് എന്ന നിലക്ക് എനിക്ക് ഈ വിഷയത്തില്‍ നിങ്ങളോട് പറയാന്‍ ഉള്ളത്....

കേരളത്തിൽ പണ്ട് തിരണ്ടുക്കല്യാണം ഉണ്ടായിരുന്നു.ആദ്യമായി ഋതുമതി ആകുന്ന പെണ്ണിന് കൊടുക്കുന്ന ചടങ്ങു.ഈ സമയം ഋതുവായ പെണ്‍കുട്ടിയെ ധാവണി സാരി തുടങ്ങിയവ ഒക്കെ ഉടുപ്പികുന്ന ചടങ്ങും ഉണ്ട്.ഇതിനെ ഋതുകാല സംസ്ക്കാരം എന്നാണ് പറയുക.പെണ്‍കുട്ടിയെ കാണാന്‍ ബന്ധുക്കളും മറ്റും വരുക,പലഹാരങ്ങള്‍ വസ്ത്രങ്ങള്‍ ആഭരണങ്ങള്‍ ഇവയൊക്കെ സമ്മാനിക്കുക,കുട്ടിയുടെ തലയില്‍ തണ്ണീരോഴുക്കല്‍( സ്വര്‍ണ്ണനാണയം ഇട്ട വെള്ളവും എണ്ണയും തലയില്‍ ഒഴിക്കുക) എല്ലാവര്ക്കും സദ്യ കൊടുക്കുക , ആട്ടവും പാട്ടും തുടങ്ങി വളരെ ഗംഭീരമായി നമ്മുടെ നാട്ടില്‍ നടത്തിയിരുന്ന ഒരു വിശേഷപ്പെട്ട ചടങ്ങ് ആണ് തിരണ്ടുക്കല്യാണം( ചടങ്ങുകള്‍ ഏറെ ഉള്ളതിനാല്‍ വിശദീകരിക്കുന്നില്ല)

ഇന്നും നമ്മുടെ ഇടയില്‍ തിരണ്ടുക്കല്യാണം എവിടെയൊക്കെയോ നടന്നു പോരുന്നുണ്ട് എന്നാണ് കേട്ടിട്ടുള്ളത്.നമ്മുടെ ഇവിടെ ഒണ്ടോ ഇല്ലയോ തനതായ രീതിയിൽ ഇന്നും south ഇന്ത്യയിൽ പല ഇടങ്ങളിലും ഈ ചടങ്ങുകൾ ഉണ്ട്.എടുത്തു പറഞ്ഞാൽ തമിഴ്നാട് ആന്ധ്രാപ്രദേശ് തുടങ്ങിയ സംസ്ഥാനങ്ങളില്‍.ആ ചടങ്ങുകള്‍ കാണാന്‍ YOUTUBE ഇല്‍ PUBERTY FUCTIONS എന്നോന്നു സെര്‍ച്ച്‌ ചെയ്‌താല്‍ മതിയാകും.പെണ്കുട്ടികള് ഋതുവാകുന്ന ദിവസം പോലും നോക്കി ആണ് അവിടെ ഒക്കെ അവരുടെ വിവാഹം പോലും നിശ്ചയിക്കുക.

ഇതെല്ലാം പോട്ടെ ഇന്ത്യയിൽ മാത്രമാണ് ഇങ്ങനെ ഒരു ആചാരം എന്നാണ് പറയുന്നത് എങ്കിൽ തെറ്റി.ലോകമെമ്പാടും വിവിധ സംസ്കാരങ്ങളിൽ PUBERTY FUCTIONS അത് പോലെ ആർത്തവ സംബന്ധിയായ പല പല ആചാരങ്ങളും ഇന്നും നിലനിൽക്കുന്നു.ഉദാഹരണം പറഞ്ഞാല്‍ നേപ്പാള്‍ ശ്രീലങ്ക,ഇന്തോനേഷ്യ,ജപ്പാന്‍,ഘാന തുടങ്ങിയ രാജ്യങ്ങള്‍.

"ആർത്തവം വന്നതോടെ സ്ത്രീ അശുദ്ധയായി, പിന്നെ അവൾക്ക് ക്ഷേത്രങ്ങളിലോ മറ്റ് ആരാധനായലങ്ങളിലോ പോയിക്കൂട, പുരുഷന്മാർക്കൊപ്പം ഒരുമിച്ചിരുന്ന് ഭക്ഷണം കഴിച്ചൂട ,അച്ചാർ കൂട്ടിക്കൂട , പായ വിരിച്ച് നിലത്തു കിടക്കണം, അവൾക്കായി പ്രത്യേകം പാത്രം, വസ്ത്രം , കാരണം അവൾ അശുദ്ധയാണ്. ആർത്തവത്തെ അശുദ്ധിയാക്കുന്ന കാടൻ ചിന്തകളാണ് മാറേണ്ടത്."

ഏറ്റവും കൂടുതല്‍ കണ്ടത് ഈ മേല്‍പ്പറഞ്ഞിരിക്കുന്ന ചില സംഗതികള്‍ ആണ്.

എങ്കില്‍ ദുരാചാരത്തില്‍ നിന്ന് തന്നെ തുടങ്ങാം.ഉദാഹരണത്തിന് തലമുറകളായി നമ്മള്‍ എന്തെങ്കിലും ഒരു കാര്യം അനുഷ്ടിച്ചു പോരുന്നു എന്ന് വെക്കൂ.ആ ഒരു കാര്യം അതിന്റെ അടിസ്ഥാന തത്വത്തെ അറിയാതെ ആചരിച്ചു വരുന്നതാണ് അനാചാരം.ഇനി ആ രീതി തന്നെ ആചരിക്കുന്നതില്‍ നിന്ന് ആര്‍ക്കും പ്രയോജനം ഇല്ല എന്ന് മാത്രമല്ല അത് അവര്‍ക്ക് ഹാനി വരുത്തുന്നു എങ്കില്‍ അതാണ് ദുരാചാരം.

അശുദ്ധി ആണ് അടുത്തത്.മലം മൂത്രം കഫം വിയര്‍പ്പു ഛര്‍ദ്ദില്‍ ഇവയൊക്കെയും വിസര്‍ജ്യം ആണ് അല്ലെ ശരീരത്തിന് ആവിശ്യമില്ലാതവ നവ ദ്വാരങ്ങളില്‍ കൂടി ശരീരം പുറം തള്ളുന്നു അതായത് ശരീരത്തിലെ മാലിന്യങ്ങള്‍ അടങ്ങിയതാണ് ഇവയോക്കയും.അതുകൊണ്ട് അശുദ്ധം എന്ന് അതായത് ശുദ്ധം അല്ലാത്തത് അല്ലെങ്കില്‍ അഴുക്ക് നീക്കം ചെയ്യപ്പെടാത്താവയെ അശുദ്ധം എന്ന് പറയുന്നു.

ഉദാഹരണം ഓടയിലെ കെട്ടി കിടക്കുന്ന വെള്ളം.അതില്‍ അനേകം മാലിന്യങ്ങള്‍ ഉണ്ടാവുമെന്ന് ഉറപ്പാണല്ലോ??? വെള്ളം തന്നെ ആണല്ലോ എന്ന് കരുതി നമ്മള്‍ അത് കുടിക്കാന്‍ ഉപയോഗിക്കുമോ ഇല്ല.ശുദ്ധമായ അതായത് അഴുക്കുകള്‍ ഒന്നും ഇല്ലാത്ത വെള്ളം ആണ് നമ്മള്‍ ഉപയോഗിക്കുക അല്ലെ??അത് പോലെ ആണ് ആര്‍ത്തവ രക്തവും,സാദ രക്തത്തെ അപേക്ഷിച്ച് ദുര്‍ഗന്ധം ഉള്ളതും നശിച്ച കോശങ്ങള്‍ ഉള്ളതും ശരീരത്തിലെ മാലിന്യവും അതില്‍ അടങ്ങിയിട്ടുള്ളത് കാരണം അത് അശുദ്ധം എന്ന് പറയുന്നു.പക്ഷെ ഇവിടെ സ്ത്രീ അശുദ്ധയാണു എന്ന് ഉള്ള വിചാരം തെറ്റാണു.

ഇനി അച്ചാര്‍ ആര്‍ത്തവകാലങ്ങളില്‍ സ്ത്രീകള്‍ അച്ചാര്‍ കഴിക്കുന്നത്‌ പണ്ട് കാലത്തെ ആളുകള്‍ വിലക്കിയിരുന്നു.
അച്ചാറുകള്‍ പൊതുവേ ഉപ്പും എരിവും പുളിയും കൂടുതല്‍ ഉള്ള ഭക്ഷണം ആണ് എന്ന് അറിയാമല്ലോ?? ആര്‍ത്തവ കാലത്ത് സ്ത്രീകളുടെ രക്തസമ്മര്‍ദ്ദം കൂടിയിരിക്കും എന്ന് മുന്‍പ് സൂചിപ്പിച്ചിരുന്നു അപ്പൊ ഉപ്പിന്റെ അംശം കൂടുതല്‍ അടങ്ങിയ അച്ചാറുകള്‍ മാതിരി ഉള്ള ഭക്ഷണ സാധനങ്ങള്‍ രക്തസമ്മര്‍ദ്ദം വീണ്ടും ഉയര്‍ത്താന് സാദ്യത ഉണ്ട് മാത്രമല്ല അച്ചാറുകളില്‍ ഉള്ള സോഡിയം വയര്‍ വീര്‍ക്കാനും കാരണമാകുന്നതാണ്.

ഇനി അടുത്തത് തറയില്‍ പായ വിരിച്ചു കിടക്കുന്നത്.ഇന്ന് ഈ കാര്യത്തിനു വല്യ പ്രസക്തി ഇല്ല കാരണം പണ്ട് കാലത്ത് ഒന്നുകില്‍ പായ അല്ലെങ്കില്‍ ചാക്ക് വിരിച്ചു ആണ് ആര്‍ത്തവ സ്ത്രീകളെ കിടത്തിയിരുന്നത്.അതും ഇന്നത്തെ പോലെ TILES ഉം MARBLE ഉം പതിപ്പിച്ച തറകള്‍ അന്ന് ഉണ്ടായിരുന്നില്ല പകരം ചാണകം മെഴുകിയത് ആയിരുന്നു എന്ന് ഓര്‍മ്മയില്‍ വെക്കണം.അപ്പൊ ചാണകം മെഴുകിയ തറക്കും ചാക്കിനും ഒക്കെ ഒരു ചെറിയ ചൂട് സ്വാഭാവികമായി ഉണ്ട്.അവിടെ കിടക്കുക വഴി ആര്‍ത്തവ സമയത്തെ രക്തസ്രാവം നല്ല രീതിയില്‍ നടക്കാനും തടസ്സമില്ലാതെ ഇരിക്കാനും ഇത് സഹായിക്കും.

അടുത്തത് പാത്രം, വസ്ത്രം. ഒരു സ്ത്രീയുടെ മൂത്രനാളി പുരുഷന്റെ അപേക്ഷിച്ച് വലുതും കൂടുതല്‍ തുറന്നു ഇരിക്കുന്നതുമാണ്.
അതുകൊണ്ട് തന്നെ സ്ത്രീകള്‍ വ്യക്തിശുചിത്വം പ്രത്യേകിച്ച് ആര്‍ത്തവ കാലങ്ങളില്‍ പാലിക്കേണ്ടത് രണ്ടിരട്ടി ആണ് ഗര്‍ഭപാത്രവും ഈ സമയങ്ങളില്‍ തുറന്നു ഇരിക്കുന്ന അവസ്ഥയില്‍ ആണ്.വൃത്തിഹീനമായ കൈകളില്‍ നിന്ന് ഭക്ഷണത്തിലെക്കും അവിടുന്ന് വയറ്റിലേക്കും രോഗാണുക്കളും മറ്റും ശരീരത്തില്‍ പ്രവേശിക്കുന്നത് പോലെ കൈകളില്‍ നിന്നും രോഗാണുക്കള്‍ യോനിയിലെക്കും ഗര്‍ഭപാത്രത്തിലേക്കും പ്രവേശിക്കാനും അത് പല തരം INFECTIONS നു കാരണമാകുന്നതാണ്.ഇതുകൊണ്ടൊക്കെ പല ആളുകള്‍ ഉപയോഗിച്ച തുണികളും പാത്രങ്ങളും മാറ്റി പ്രത്യേകം തുണി പാത്രം മുതലായവ നല്‍കുകയും മറ്റുള്ളവരില്‍ നിന്ന് അകറ്റി നിര്‍ത്തുകയും ചെയ്തു.

ഒരു സ്ത്രീയെ സംബന്ധിച്ച് നോക്കുന്നത് എല്ലാം ജോലികള്‍ ആണ്.വീട്ടു ജോലിക്കു ഒരു പ്രത്യേകത ഉണ്ട് എന്താണ് എന്ന് വെച്ചാല്‍ ജോലി ചെയ്യാന്‍ ആണെങ്കില്‍ ഒരുപാട് ഉണ്ട് എന്നാല്‍ ചെയ്തിടം ഒട്ടു കാണാനും ഉണ്ടാകില്ല.അതുകൊണ്ടാണ് പുരുഷകേസരികള്‍ നീ ഇത്രയും നേരം ഇവിടെ എന്നാടുക്കുവായിരുന്നു എന്ന സ്ഥിരം പല്ലവി സ്ത്രീകളോട് ആവര്‍ത്തിക്കുന്നത്.

എത്ര വയ്യാഴിക ഉണ്ടെങ്കിലും അത് കാര്യമാക്കാതെ ജോലി ചെയ്യുന്നവര്‍ ആണ് ഭൂരിഭാഗം സ്ത്രീകളും.ഒരു നിമിഷം പോലും വെറുതെ കളയാന്‍ ഇല്ല.പണ്ട് കാലത്ത് ജോലി ഭാരം ഇന്നത്തെ അവസ്ഥയെ വെച്ചു വളരെ കൂടുതല്‍ ആയിരുന്നു എങ്കില്‍ പോലും ഇന്ന് എത്രയൊക്കെ ഉപകരണങ്ങള്‍ ഉണ്ടെങ്കിലും ജോലിക്ക് ഒന്നും ഒരു കുറവും ഇല്ല.

ആര്‍ത്തവം കേവലം വിസര്‍ജ്യവും ശാരീരികപ്രക്രിയും എന്നതിനേക്കാള്‍ ഉപരി ഒരു സ്ത്രീയുടെ ആരോഗ്യത്തിന്റെ അടിസ്ഥാന ഘടകം കൂടി ആണ് എന്ന് മറക്കരുത്.കാരണം വിസര്‍ജ്യങ്ങളും മറ്റും ജീവിതകാലം മുഴുവന്‍ ഒരു വ്യക്തിയില്‍ നീണ്ടു നില്‍ക്കുമ്പോള്‍ ആര്‍ത്തവം കുറച്ചു വര്‍ഷങ്ങള്‍ മാത്രം സ്ത്രീയില്‍ ഉണ്ടാവുന്നതാണ്.ആര്‍ത്തവകാലത്തെ പരിചരണകുറവ് മൂലം ഭാവിയില്‍ സ്ത്രീകള്‍ക്ക് ഉണ്ടാകാവുന്ന രോഗങ്ങള്‍ പലതാണ്.HORMONE CHANGES തുടങ്ങി ശരീരം തന്നെ ഒരു CLEANING PROCESS ചെയ്യുന്ന സമയമാണ്.ആ സമയങ്ങളില്‍ പരിപൂര്‍ണ്ണ വിശ്രമം ആണ് ഓരോ സ്ത്രീക്കും ആവിശ്യം.

ഇന്നത്തെ കാലത്തു അതു നടക്കില്ല എന്നു മാത്രം.

ആര്‍ത്തവം ആയിരിക്കുന്ന സമയങ്ങളില്‍ ഭാരമുള്ള സാധങ്ങൾ എടുത്തുകൂടാ അലെങ്കില്‍ ശരീരം ആയാസ്സപ്പെട്ടു ഒരു ജോലിയും ചെയ്തു കൂടാ കാരണം മുന്‍പ് സൂചിപ്പിച്ച പോലെ ഗര്‍ഭപാത്രം തുറന്നു ഇരിക്കുന്നത് കൂടാതെ താഴോട്ട് ഇറങ്ങി ഇരിക്കുന്ന അവസ്ഥയാണ്‌ ആണ് ഉള്ളത്.ആ സമയം ഭാരമുള്ള ജോലികള്‍ ചെയ്യുന്നത് വഴി ഭാവിയിൽ ഗർഭപാത്രം ഇറങ്ങി വരാൻ സാധ്യത വളരെ കൂടുതല്‍ ആണ്.

മറ്റൊരു പ്രധാന കാര്യം ആര്‍ത്തവ രക്തം ഇടതടവ് ഇല്ലാതെ ഒഴുകേണ്ടത് അത്യാവശ്യം ആണ് അതായത് തടസ്സം ഇല്ലാതെ ഒഴുകണം. ദേഹം അനങ്ങിയുള്ള ജോലികള്‍ ഈ ഒഴുക്കിനെയും തടസ്സപ്പെടുത്തും.ആദിവാസി സമൂഹത്തില്‍ ഋതു ആയാല്‍ അവര്‍ അരപ്പോക്കം ഒഴുക്ക് വെള്ളത്തില്‍ പോയി ഇരിക്കുന്ന പതിവ് ഉണ്ടെന്നു കേട്ടിരിക്കുന്നു.
തടസ്സമില്ലാതെ രക്തം ഒഴുകി പോകുന്നതിനു വേണ്ടി ആണ് ഇങ്ങനെ ചെയ്യുന്നത്.ശരിയായ രീതിയില്‍ രക്തസ്രാവം ഉണ്ടായില്ലെങ്കില്‍ രക്തം കെട്ടിക്കിടന്നു മുഴകള്‍ ഉണ്ടായി അത് ഭാവിയില്‍ വിട്ടു മാറാത്ത നടുവേദന മുതല്‍ കാന്‍സര്‍ വരെ ഉണ്ടാക്കാം.ഇത് കൊണ്ടൊക്കെ ആണ് ആര്‍ത്തവ കാലങ്ങളില്‍ വിശ്രമം വേണം എന്ന് പറയുന്നത്.രക്തം തടസ്സം കൂടാതെ ഒഴുകുന്നതിനും വേദന കുറക്കുന്നതിനും ഡോക്ടര്‍മാര്‍ ചെറു ചൂടുവെള്ളത്തില്‍ കുളിക്കാന്‍ പറയാറുണ്ട്‌.ഇതേ കാര്യത്തിനു തന്നെ ആണ് പണ്ട് സ്ത്രീകളെ നിലത്തു കിടത്തിയിരുന്നത് കാരണം പണ്ട് കാലങ്ങളിൽ ചാണകം മെഴുകിയ തറകൾ ആയിരുന്നു.ആ തറക്ക് ചെറു ചൂട് ഉണ്ട്. അത് ആർത്തവ രക്തം ഒഴുകുന്നതിന് സഹായകമാകും.

ആയുർവേദത്തിൽ ഋതു ആയി ഇരിക്കുന്ന ഒരു രോഗിക്ക് കുറഞ്ഞത് 4 ദിവസത്തേക്ക് എങ്കിലും ചികിത്സ ഇന്നും നൽകാറില്ല.മാത്രവുമല്ല ആർത്തവ സമയത്ത് പാലിക്കേണ്ട ചര്യകളെ കുറിച്ചു ആയുർവേദത്തിൽ വളരെ വ്യക്തമായി പറയുന്നുണ്ട്.

ഇനി ഇതൊക്കെ MODERN SCIENCE അല്ലെങ്കിൽ MEDICAL SCIENCE ന്റെ അടിസ്ഥാനത്തിൽ മാത്രമേ വിശ്വസിക്കു എന്നാണെങ്കിൽ ഏതെങ്കിലും ഡോക്ടര്‍മാരോട് ചോദിക്കാം.

ആര്‍ത്തവ കാലത്തെ ബുദ്ധിമുട്ടുകളെ മനസിലാക്കിയും ആര്‍ത്തവ പരിചരണത്തിന്റെ പ്രാധ്യാന്യം മനസിലാക്കിയും കൊണ്ടാണ് പണ്ടുള്ളവര്‍ ആർത്തവമുള്ള സ്ത്രീകളെ പലകാര്യങ്ങളിൽ നിന്നും വിലക്കിയത് എന്ന് മേല്‍പ്പറഞ്ഞ കാര്യങ്ങളില്‍ നിന്നും മനസിലാക്കവുന്നതെ ഒള്ളൂ.എന്നാല്‍ ഇത്തരം സമ്പ്രദായങ്ങള്‍ അനുഷ്ടിക്കുന്നു എന്ന് അറിയാതെ ആളുകള്‍ പിന്‍തുടര്‍ന്ന് വന്നു എന്നുള്ളത് വാസ്തവം.

എന്നിരുന്നാലും എന്ത് കാര്യവും അരുത് എന്ന് പറയുന്നത് എന്ത്കൊണ്ട് പാടില്ല എന്ന് എന്തിനെയും എതിര്‍ക്കുന്ന ആളുകള്‍ ആണ് ഇന്ന് ഉള്ളത്.പണ്ടുള്ളവര്‍ കാലിന്മേല്‍ കാല്‍ കയറ്റി വെച്ചിരിക്കരുത് എന്ന് പറയുമായിരുന്നു.അധികനേരം കാലിന്മേല്‍ കാല്‍ കയറ്റി ഇരിക്കുന്നത് ആരോഗ്യത്തിനു നല്ലതല്ല എന്ന് ഇന്ന് ശാസ്ത്രം തെളിയിച്ചിട്ടുണ്ട്.ഇതുപോലെ ആണ് ഓരോ കാര്യങ്ങളും.

പിന്നെ ഇവിടെ എടുത്തു പറയേണ്ട മറ്റൊരു പ്രധാന കാര്യമാണ് ആര്‍ത്തവകാലത്തുള്ള സ്ത്രീകളുടെ ക്ഷേത്രപ്രവേശനം.
ആര്‍ത്തവത്തെ ഭയക്കുന്ന ദൈവം,എന്റെ കാലിന്റെ ഇടയിലോട്ടു നോക്കണ്ട ദൈവമേ എന്ന് ചില പുരോഗമന വാദികള്‍ ആയ ചേച്ചിമാര്‍ ദൈവത്തോടു പറഞ്ഞത് പുള്ളിക്കാരന്‍ രക്തം കണ്ടു തലകറങ്ങി വീഴണ്ട എന്ന് കരുതിയിട്ടാകണം.എന്താ ഭക്തി??? "ഋതുവായ പെണ്ണിനുമിരപ്പനും ദാഹകനും പതിതന്നുമഗ്നിയജനം ചെയ്ത ഭൂസുരനും ഹരിനാമകീര്‍ത്തനമിതൊരു നാളുമാര്‍ക്കുമുട- നരുതാത്തതല്ല ഹരിനാരായണായ നമഃ" എന്നാണ് തുഞ്ചത്ത് എഴുത്തച്ചന്‍ പാടിയത്.ആര്‍ക്കും ഒരിക്കലും നിഷേധിക്കപ്പെട്ടതല്ല ഭഗവത് നാമസങ്കീര്‍ത്തനം എന്ന് സാരം.മുതിര്‍ന്ന കാരണവന്മാര്‍ ഉള്ള വീട്ടില്‍ ഒക്കെ ആണെങ്കില്‍ ആര്‍ത്തവമുള്ള സ്ത്രീകളോട് നാമം ജപിച്ചു കൊണ്ട് ഇരിക്കാന്‍ ആണ് പറയുക.

തിരണ്ടുക്കല്യാണം നടക്കുന്ന സമയം കുളിച്ചു വരുന്ന കുട്ടിയുടെ കയ്യില്‍ വാല്‍ക്കണ്ണാടി കൊടുക്കുന്ന ഒരു ചടങ്ങ് ഉണ്ട്.നിത്യ ലക്ഷ്മി സാന്നിധ്യം ഉള്ള അല്ലെങ്കില്‍ ദേവി സാന്നിധ്യം ഉള്ള വസ്തുവാണ് വാല്‍ക്കണ്ണാടി.
അതുകൊണ്ടാണ് ചില ക്ഷേത്രങ്ങളില്‍ ദേവി പ്രതിഷം വാല്‍ക്കണ്ണാടി രൂപത്തില്‍.അപ്പൊ കുളിച്ചു വരുന്ന കുട്ടിയുടെ കയ്യില്‍ കണ്ണാടി കൊടുക്കുന്നത് വഴി കുട്ടിയുടെ ജീവിതത്തിലെ വഴിത്തിരിവാകുന്ന ഏറ്റവും പ്രധാനപ്പെട്ട ചടങ്ങില്‍ ദേവിയുടെ സാന്നിധ്യം കുട്ടിയോടൊപ്പം ഉണ്ടാവണം എന്ന സങ്കല്പം ആണ് അവിടെ.

ഈശ്വരനെ വിശ്വാസം ഉണ്ടെങ്കില്‍ മനസ്സാല്‍ എവിടെ ഇരുന്നും ഇതു സാഹചര്യത്തിലും സ്മരിക്കാം അത് ചെയ്യില്ല,7 ദിവസങ്ങള്‍ ഒഴിച്ച് ബാക്കി 20 ദിവസങ്ങള്‍ ഉണ്ട് അപ്പൊ ഒന്നും പോകണ്ട ആര്‍ത്തവം ആയിരിക്കുമ്പോ തന്നെ പോകണം.

ക്ഷേത്ര ദർശനത്തിന് മിനിമം പറയുന്നത് പഞ്ച ശുദ്ധിയാണ്. അതിൽ ഒന്നാണ് ശരീര ശുദ്ധി.അപ്പോൾ ശരീര ശുദ്ധിയോട് കൂടിയേ ക്ഷേത്ര ദർശനം പാടോള്ളൂ.അത് സ്ത്രീ ആയാലും പുരുഷൻ ആയാലും എല്ലാവർക്കും ഇത് ബാധകമാണ്.തുറന്ന മുറിവോട് കൂടിയും ആരും ക്ഷേത്രത്തിൽ പോകാൻ പാടില്ല.എന്തിനേറെ പറയുന്നു?ഒരാളുടെ ദേഹത്ത് ചെറിയ ഉണങ്ങാത്ത മുറിവ് ഉണ്ടെങ്കിൽ വിമാന യാത്ര കൂടി അനുവദനീയമല്ല.

സാധാരണ ഗതിയില്‍ മലമൂത്രാദി വിസര്‍ജ്യങ്ങള്‍ ഒരു പരിധിവരെ പിടിച്ചു നിര്‍ത്താന്‍ മനുഷ്യ ശരീരത്തിന് കഴിയും പക്ഷെ ഒരാള്‍ക്ക്‌ അതിസാരം ഉണ്ടെന്നു വെക്കു അല്ലെങ്കില്‍ നിര്‍ത്താതെ മൂത്രം പോകുന്നു എന്ന് വെക്കു എന്തെകിലും ഒരു യാത്ര പോകുന്നത് പോയിട്ട് വീടിനു പുറത്തെങ്കിലും ഇറങ്ങാന്‍ അയാളുടെ ശാരീരിക മാനസിക നില അനുവദിക്കുമോ??? ഇതുപോലെ ആണ് ആര്‍ത്തവ രക്തവും ഇതുപോലെ പിടിച്ചു നിര്‍ത്താവുന്ന ഒന്നല്ല.മാത്രവുമല്ല ഈ സമയത്തെ എല്ലാ ബുദ്ധിമുട്ടുകളും മനസിലാക്കിയാണ് പല കാര്യങ്ങളില്‍ നിന്നും സ്ത്രീകളെ വിലക്കിയത്.

ഇത് വ്യക്തി സ്വാതന്ത്ര്യതിന്റെയോ സ്ത്രീവിരുദ്ധതയുടെയോ പ്രശ്നം അല്ല.ഒരു ബാങ്കില്‍ അല്ലെങ്കില്‍ ഒരു ഓഫീസില്‍ അല്ലെങ്കില്‍ ഒരു ഡോക്ടറെ കാണാന്‍ ആണെങ്കില്‍ കൂടി അവിടുത്തെ നിയമങ്ങളും നിയന്ത്രണങ്ങളും എല്ലാവരും അനുസരിച്ച് പോരും എന്നാല്‍ ഒരു ക്ഷേത്രത്തിലെക്കു വരുമ്പോള്‍ മാത്രം ഇതൊന്നും വേണ്ട എന്ന് പറയുന്നത് എന്തുകൊണ്ടാണ്???ഓരോ ആചാരങ്ങളും അനുഷ്ടാനങ്ങളും ഓരോ സംസ്ക്കാരത്തിന്റെ ഭാഗവുമാണ്.മാത്രമല്ല ഇതൊക്കെ മനുഷ്യന്റെ ജീവിതത്തില്‍ അച്ചടക്കങ്ങളും ക്രമീകരിക്കാന്‍ വേണ്ടി പറഞ്ഞിട്ടുള്ളവയുമാണ്.

ആര്‍ത്തവ കാലത്ത് ചെയ്യരുത് എന്ന് പറയുന്ന ഒരു കാര്യവും ആര്‍ക്കും ഒരു ബുദ്ധിമുട്ട് ഉണ്ടാക്കുന്നതോ എന്തെങ്കിലും ഹാനി വരുത്തുന്നതോ അല്ലെങ്കില്‍ ഭാരപ്പെട്ട ജോലിയും അല്ല.പിന്നെ എന്തുകൊണ്ട് എതിര്‍ക്കുന്നു???

ക്രൂരമായി ശാരീരിക ബുദ്ധിമുട്ടുകളും പീഡകളും ഏല്‍പ്പിക്കുന്ന ആര്‍ത്തവകാലത്തെ ചില സമ്പ്രദായങ്ങള്‍ ഇന്നും നിലവില്‍ ഉണ്ട് അതൊക്കെ എതിര്‍ക്ക പെടെണ്ടതും ആണ്.

മാതൃത്വത്തിലെക്കുള്ള ആദ്യ പടിയാണ് ആർത്തവം എന്ന് വാ കൊണ്ട് തോന്നുമ്പോള്‍ പറയുന്നത് അല്ലാതെ ആര്‍ത്തവകാലത്ത് സ്ത്രീകള്‍ക്ക് വേണ്ടുന്ന പരിച്ചരണത്തെ കുറിച്ച് സ്ത്രീ ശാക്തീകരണം വിളമ്പുന്ന ആരും ഇന്നെവരേ പറഞ്ഞു കണ്ടിട്ടില്ല.
സ്ത്രീയുടെ ആരോഗ്യത്തെ കരുതി ആര്‍ത്തവമുള്ള ദിവസങ്ങളില്‍ കുറഞ്ഞത്‌ 2 ദിവസത്തെ അവധി എങ്കിലും അനുവദിക്കാന്‍ അവര്‍ വാദിച്ചു കണ്ടിട്ടുമില്ല പകരം എന്തൊക്കെ നല്ല കാര്യങ്ങള്‍ പറഞ്ഞിട്ടുണ്ടോ അതൊക്കെ എന്തിനു എന്ന് പോലും അറിയാതെ മുക്തകണ്ഠം എതിര്‍ക്കുക മാത്രമാണ് ചെയുന്നത്.ആര്‍ത്തവം ആഘോഷം ആക്കുന്നത് മോശം ആണ് എന്ന് പറയുന്നവര്‍ തന്നെ ആണ് ആര്‍ത്തവത്തിനു വേണ്ടി വാദിക്കാന്‍ വരുന്നത്.

ഇന്ന് കാലം മാറി പണ്ട് ഉണ്ടായിരുന്ന സ്ത്രീകളുടെ ആരോഗ്യത്തിന്റെ പകുതി പോലും ഇന്നത്തെ സ്ത്രീകള്‍ക്ക് ഇല്ല.ഭക്ഷണ രീതി മാറി ജീവിത രീതി മാറി.നേരത്തെ ഒക്കെ ഒരു 12 വയ്യസ്സ് മുതല്‍ 16 വയസ്സിനു ഉള്ളില്‍ ആയിരുന്നു ആര്‍ത്തവം തുടങ്ങിയിരുന്നത് എങ്കില്‍ ഇന്ന് അത് 7 8 വയ്യസുകളില്‍ ഋതു ആകുന്ന കുട്ടികള്‍ വരെ ഉണ്ട്.മാത്രവുമല്ല ശാരീരിക ബുദ്ധിമുട്ടുകള്‍ ഒരു പ്രായം കഴിഞ്ഞാണ് തുടങ്ങിയിരുന്നത് എങ്കില്‍ ഇന്ന് 20 വയസ്സ് കഴിയുമ്പോള്‍ മുതല്‍ നടുവേദന കാലുവേദന തുടങ്ങുകയായി.കുറഞ്ഞത്‌ ഒരു 50 വയസ്സ് കഴിഞ്ഞു അല്ലെങ്കില്‍ അതിനോട് അടുത്ത പ്രായത്തില്‍ ഉണ്ടാവേണ്ട ആര്‍ത്തവവിരാമം വളരെ നേരത്തെ തന്നെ ഉണ്ടാകുന്നു.പോരാത്തതിന് കല്യാണം കഴിഞ്ഞു ഒരു കുഞ്ഞു ജനിക്കുന്നതിനു മുന്‍പ് തന്നെ പല കാരണങ്ങള്‍ കൊണ്ടും ഗര്‍ഭപാത്രം എടുത്തു കളയണ്ട അവസ്ഥകള്‍ വരുന്നു.

ഗര്‍ഭവതി ആയിരിക്കുന്ന ഒരു സ്ത്രീയെ എങ്ങനെ പരിപാലിക്കുന്നുവോ അതുപോലെ തന്നെ ആര്‍ത്തവമായിരിക്കുന്ന സ്ത്രീയെയും പരിപാലിക്കണം,ഗര്‍ഭധാരണം ജീവന്റെ തുടക്കമാണ് എങ്കില്‍ ആര്‍ത്തവം അതിന്റെ അന്ത്യവുമാണ്.രണ്ടും തുല്യ പ്രാധ്യാന്യം അര്‍ഹിക്കുന്നു.

ഇന്ന് കാണുന്ന സാനിട്ടറി പാഡുകളുടെ പരസ്യത്തില്‍ കാണിക്കുന്ന പോലെ ഓടാനും ചാടാനും ഫുട്ബോള്‍ കളിക്കാനും പോയാല്‍ വഴിയെ പോകുന്ന വയ്യാവേലികളെ തോളില്‍ എടുത്തു വെച്ചു എന്ന് കരുതിയാല്‍ മതി.

സ്ത്രീ ജനങ്ങളോട് പറയാന്‍ ഉള്ളത് പ്രായമായ പെണ്‍കുട്ടികള്‍ ഉള്‍പ്പടെ ഉള്ള നിങ്ങളുടെ ആണ്‍മക്കള്‍ക്ക്‌ കൂടി ആര്‍ത്തവത്തെ കുറിച്ചും നിങ്ങളുടെ ആ സമയത്തെ കുറിച്ചും വേണ്ടുന്ന ആരോഗ്യ പരിപാലനത്തെ കുറിച്ചും പറഞ്ഞു കൊടുക്കുക.BIOLOGY പഠിപ്പിക്കുന്ന ടീച്ചര്‍മാര്‍ "ആ പേജുകള്‍" കുട്ടികളോട് പിന്നെ നിങ്ങള്‍ തന്നെ വായിച്ചാല്‍ മതി എന്ന് പറഞ്ഞു മറിച്ചു വിടാതെ അവരെയും കാര്യങ്ങള്‍ പറഞ്ഞു മനസിലാക്കി കൊടുക്കുക.ആര്‍ത്തവബോധവല്‍ക്കരണം തുടങ്ങിയ കാര്യങ്ങള്‍ ആണ്‍കുട്ടികളെയും ചേര്‍ത്തു ഇരുത്തി പറഞ്ഞു കൊടുക്കുക.ഓരോ പെണ്‍കുട്ടിയുടെയും ജീവിതത്തിലെ ഈ സുപ്രധാന മുഹൂര്‍ത്തം ആഘോഷമാക്കുക.

ഇനി പുരുഷ കേസരികളോട് നിങ്ങളുടെ വീട്ടിലെ സ്ത്രീകള്‍ അത് നിങ്ങളുടെ അമ്മയോ സഹോദരിയോ ഭാര്യയോ ആയിക്കോട്ടെ ആര്‍ത്തവമായിരിക്കുന്ന സമയം അവരെ കഴിവതും ജോലികള്‍ ചെയ്യിക്കാതെ അവര്‍ക്ക് വേണ്ടുന്ന വിശ്രമം നല്‍കാന്‍ ശ്രദ്ധിക്കുക.

സ്ത്രീകള്‍ ഒരു കുടുംബത്തിന്റെ നാഡിയും വിളക്കും ഐശ്വര്യവുമാണ് എന്നാണ് കാരണവന്മാര്‍ പറഞ്ഞിട്ടുളത്‌.ഓരോ സ്ത്രീകളെയും സംരക്ഷിക്കുക തന്നെ വേണം.അത് സ്ത്രീയും അബലയും തബലയും ചെണ്ടയും മദ്ദളവും ആയതു കൊണ്ടല്ല.ഓരോ കുടുംബത്തിലെയും സമൂഹത്തിലെയും വിലമതിക്കാന്‍ ആവാത്ത സ്വത്താണ് സ്ത്രീകള്‍.അത് ആദ്യം മനസിലാക്കുക.